(Krimeo, Jalto, 11-19 sep 2004)
(la mallongigita versio de l' artikolo aperis aŭtune en "La ondo de Esperanto")
Ĉi-septembre en Jalto (Krimeo, Ukrainio) post pli
ol 15-jara interrompo denove okazis la iam furora
festivalo "Velura sezono", kiu en la 80-aj jaroj estis
unu el la plej popularaj E-aranĝoj de eksa Sovetio.
Ekde la 11-a ĝis la 19-a de septembro la aranĝon
sume partoprenis iom pli ol 90 personoj el Ukrainio,
Rusio, Belorusio, Usono, Francio, Hungario, Pollando,
Svedio, Litovio kaj Japanio. Inter la partoprenantoj estis
kaj komencantoj, kaj spertaj esperantistoj; eĉ kelkaj
famaj E-aŭtoroj kaj plenumantoj. La semajno plenis je
plaĝumado kaj ekskursoj tra la Suda Bordo de Krimeo;
okazis kelkaj turistaj marŝoj. Ĉiutage okazis dunivelaj
E-kursoj; estis okazigitaj kelkaj temaj prelegoj-diskutrondoj: pri E-muziko, bahaismo, "Pasporta Servo"
kaj vojaĝoj pere de Esperanto (notindas, ke la
aranĝon partoprenis mondvojaĝanto el Japanio, kies
turneo tra dekoj da landoj daŭras jam pli ol 3 jarojn).
Ĉiu vespero estis plena de amika etoso, gitarludo
kaj kantado.
Tamen la plej distinga trajto de la aranĝo estis ties
malfermiteco al neesperantista publiko (la renkontiĝon
partoprenis kelkaj bardoj-neesperantistoj) kaj granda
atento al informado pri E. Dank' al modela laboro de
Eŭgenia Zvereva el Kievo la gazetar-komuniko pri la
aranĝo estis anticipe distribuita al kelkaj grandaj
novaĵ-agentejoj de Ukrainio. Dum la aranĝo mem en la
urba biblioteko okazis gazetar-konferenco, kiun postsekvis
komuna koncerto de la partoprenantoj en la Livadia orgena
halo. La rezulto de la informa kampanjo estas pli ol
solida: mencioj pri la festivalo aperis en kelkaj gravaj
ukrainiaj ttt-ejoj, preskaŭ ĉiuj ĵurnaloj de Jalta kaj
kelkaj tutkrimeaj ĵurnaloj publikigis favorajn artikolojn;
pri la aranĝo raportis jaltaj televido kaj radio kaj
ankaŭ tutukrainia televid-kanalo ICTV (kies ĵurnalistoj
filmis la gazetar-konferencon).
Krome la partoprenantoj organizis 3 (!) malfermajn
koncertojn por la urbanoj, la prezentadoj okazis en la urba
kulturdomo kaj unufoje - en la centra placo de la urbo sub
la ĉielo. La koncertoj estis aparte brilaj kaj dancigaj
dank' al fama E-stelulo JoMo (li havis unu recitalon kaj
partoprenis ankaŭ aliajn du koncertojn kiel ordinara
partoprenanto), kies veno en Jalton multe kontribuis al
sukceso de la aranĝo. Dum ĉiu koncerto okazis informado
pri Esperanto. Ne estos troigo diri, ke la aranĝo
estis bona modelo por estontaj informaj kampanjoj.
Kiel mankojn de la aranĝo oni povas nomi iom maldensan
programon, kelkajn organizajn kaj loĝ-problemetojn kaj ankaŭ
iom nesufiĉan reklamadon de la koncertoj - ilin vizitis ne
tiom multe da homoj, kiom oni esperis (eble kulpas la fakto,
ke en Jalto samtempe okazis 5 aliaj grandaj festivaloj). Sed
ĉiu komenco estas malfacila; sekvajare la organizantoj
nepre konsideros la ĵusan sperton.
Por la sekva festivalo oni planas eĉ pli grandigi la
kvanton de partoprenantoj-neesperantistoj, invitante famajn
bardojn kaj kanto-plenumantojn, do la aranĝo nepre evoluigos
la informadajn sukcesojn kaj atingojn. Tamen ni tutkore
invitas ankaŭ esperantistojn, kiuj neniuokaze enuos en
la plej fama ripoz-loko de eksa Sovetio. Bonvenon en Jalton
por "Velura sezono - 2005".
Sube vi povas elekti inter kelkaj fotoj de la aranĝeroj (la fotoj estas
sufiĉe grandaj, sed, eble, ne tre bonkvalitaj!):
| Momento dum gazetar-konferenco; parolas Ĵenja Zvereva (Kievo) |
| Feliĉaj partoprenantoj post la surstrata |
| Komuna manĝado de fruktoj en plaĝo. |
| JoMo koncertas. |
| La publiko frenezas dum koncerto de JoMo. |